Dette er nettsida til standardordbøkene Bokmålsordboka og Nynorskordboka. Standardordbøkene blir løpande oppdaterte i tråd med rettskrivingsvedtak i Språkrådet, og det er dermed her du finn fasiten på kva som er gjeldande og fullstendig rettskriving i bokmål og nynorsk.
Språkrådet og Universitetet i Bergen eig Bokmålsordboka og Nynorskordboka i fellesskap. Sidan 2016 har det redaksjonelle arbeidet med standardordbøkene vorte utført ved Universitetet i Bergen, der fleire avdelingar er involverte. Ordbokredaktørane er tilsette ved Institutt for lingvistiske, litterære og estetiske studium,Språksamlingane forvaltar ordbøkene og kjeldegrunnlaget dei byggjer på, og det datatekniske arbeidet går føre seg ved IT-avdelinga og Språksamlingane.
I perioden frå 2018 til utgangen av 2024 gjekk standardordbøkene gjennom ein større innhaldsrevisjon. Dette arbeidet kan du lese meir om på nettsida Revisjonsprosjektet. Rolla til Språkrådet i dette prosjektet var å kvalitetssikre innhaldet i artiklane, i tillegg til å avgjere korleis ord skal skrivast og bøyast på bokmål og nynorsk. Redaksjonen ved Universitetet i Bergen avgjer kva ord, tydingar og anna innhald i artiklane som skal vere med. Arbeidet med innhaldet i ordbøkene held fram etter prosjektslutt, og redaksjonen legg jamleg ut nye og reviderte ordartiklar.
I april 2024 vart det lansert ei oppgradering av ordboksida. Denne nye versjonen har betre universell utforming enn den første versjonen av ordbøkene.no, og ho inneheld nye funksjonar. Bokmålsordboka og Nynorskordboka er to sjølvstendige, einspråklege ordbøker, men i denne versjonen får brukaren òg forslag til omsetjingar mellom bokmål og nynorsk basert på maskinomsetjingsplattforma Apertium og til dels Språkrådets Administrativ ordliste.